Մտահղացումների լաբորատորիա .:::. Laboratory of Ideas

Մեր հերթական մտահղացման հիմքում տուրիզմն է, մեր երկրի առանձնահատկությունները և հատկապես հյուրընկալությունը: Հավատացեք, որ չնչին ներդրումների, լավ գովազդի, կազմակերպչական աշխատանքների և այս մտահղացման շնորհիվ հնարավոր է հիմնել սեփական բիզնես, զբաղվել հաճելի աշխատանքով և վաստակել խոշոր գումարներ, որովհետև արդյունքում կօգտվեն բազմաթիվ մարդիկ:

Ինչպե՞ս են մարդիկ արտերկրում սովորաբար գնում ճանապարհորդության: Նրանք ընտրում են համար երթուղի, և փորձում հիշել, թե որ քաղաքում ինչ ծանոթ կամ բարեկամ ունեն: Եթե այդպիսիք չկան, ապա երթուղին կամ փոխվում է, կամ էլ ստիպված բնակարան է պետք վարձել, ինչի համար էլ լրացուցիչ գումար կծախսվի: Եթե անգամ կան ծանոթներ կամ բարեկամներ, ապա այս դեպքում էլ նոր խնդիրներ են առաջանում, շատ դժվար է գտնել նրանց: Զանգից հետո էլ պարզվում է, որ ոչ բոլորը կարող են հյուրեր ընդունել: Մեկի ֆինանսական վիճակը լավ չէ, մյուսի ընտանիքն է մեծ և այլն:

Բայց այդ նույն քաղաքներում բազմաթիվ մարդիկ կան, որոնք հաճույքով կընդունեն հյուրերի: Հնարավոր է, որ նրանց պարզապես հետաքրքիր է շփվել այլ մարդկանց հետ, նոր ծանոթներ ձեռք բերել և նոր տեղեկություններ իմանալ այլ երկրների մասին: Քիչ չեն այդպիսի մարդիկ նաև Հայաստանում, հատկապես եթե հաշվի ենք առնում մեր ազգին բնորոշ հյուրընկալությունը:

Հայաստան այցելողների մեջ մեծ թիվ են կազմում սփյուռքահայերը, որոնք կարծում եմ ողջ աշխարհում տեսել են հյուրանոցներ և շքեղ սպասարկում և դրա համար չէ, որ գալիս են Հայաստան:

Մտահղացումն ըստ էության հետևյալն է – Ընտանիքը կամ անձը, որն ապրում է Հայաստանում ընդունում է իր ընտրած զբոսաշրջիկին, առանց վճարի:  Զբոսաշրջիկն ի սկզբանե ունենում է իր կողքին տեղացի բնակիչ, որն օգնում է իրեն կողմնորոշվելու, չխաբվելու, կազմակերպելու տարբեր էքսկուրսիաներ և այլն: Զբոսաշրջիկը չի վճարում կեցության համար: Հյուրընկալողը, ի դեմս զբոսաշրջիկի, ձեռք է բերում լավ բարեկամ, կապեր, հետագայում համատեղ բիզնես ձեռնարկելու, փոխադարձ հյուրընկալվելու հնարավորություն:

Ինչպես կարելի է գումար վաստակե՞լ

Այստեղ ոչ պակաս շահավետ վիճակում եք հայտնվում նաև Դուք: Ձեզ վճարում է զբոսաշրջիկը, որի համար Դուք մատուցում եք հյուրընկալողին գտնելու ծառայությունները: Անհրաժեշտ է ստեղծել կայք, որտեղ կարող են գրանցվել երկու կողմն էլ և գտնել միմյանց՝ Ձեր օգնությամբ: Դուք դրան կարող եք անվանել ինչպես ցանկանաք: Դա կլինի Ձեր յուրօրինակ բիզնեսը: Ձեր կողմից ստեղծված ծառայությունը կկայանա նրանում, որ մարդկանց պետք է ապահովել անհրաժեշտ տեղեկատվությամբ, այն մասին, թե ով և որտեղ կարող է հյուրընկալել արտերկրից ժամանած հյուրերին: Դուք պետք է ունենաք մանրամասն ինֆորմացիա այն մարդկանց մասին, ովքեր պատրաստ են իրենց տանն արտերկրից հյուրեր ընդունել: Բայց կոնտակտեր ժամանակից շուտ պետք չէ տրամադրել կողմերից ոչ մեկին: Ցանկացած հարց պետք է Ձեր միջոցով քննարկվի և միայն հստակ պայմանավորվածություն ձեռք բերելուց հետո կողմերին կտաք կոնտակտային տվյալներ` իհարկե որոշակի գումարի դիմաց: Ըստ էության այդ գործում ամեն ինչ Դուք եք անում, իսկ կողմերին միայն մնում է պայմանավորված ժամին լինել պայմանավորված հասցեում: Հաճախ նման ճանապարհորդությունները երկարատև են լինում և հանգստացողները չեն սահամանափակվում մի քաղաք, մի երկիր մեկնելով: Այդ իսկ պատճառով, հնարավոր է, որ այլ քաղաքներում էլ, նմանատիպ ընտանիքներ գտնելու անհրաժեշտություն առաջանա: Բնականաբար ամեն մի հասցեի համար պետք է առանձին գումար վճարել:

Բնական է, որ շատ հաճախորդներ ունենալու համար անհրաժեշտ է, որ կայքում ինչքան հնարավոր է շատ տեղեկատվություն լինի, քաղաքների, հյուրընկալող ընտանիքների, նրանց նախասիրությունների վերաբերյալ: Բայց նաև պետք է այնպես անել, որ հաճախորդները կարողանան շփվել միայն Ձեր միջոցով, մինչև վերջնական պայմանավորվածություն ձեռք բերելը:

Գրանցեք կայքը փնտրող համակարգերում և գնեք նրա համար գովազդային տեղ` հանգստի, տուրիզմի և ճանապարհորդությունների հետ կապ ունեցող բոլոր բառերով: Այս ամենը հնարավոր է իրականացնել ինչպես հայրենիքում,այնպես էլ արտերկրում: Վերջինս ավելի շատ եկամուտ կարող է բերել:

Ամենակարևոր եկամտի աղբյուրը նաև գովազդն է: Ձեր պոտենցիալ գովազդատուներն են զբոսաշրջիկների հետ աշխատող տարբեր ծառայություններ մատուցող ընկերությունները, տրանսպորտային ծառայությունները, ռեստորանները, ակումբները և այլն:

Ցանկության դեպքում կարող ենք առավել մանրամասն տեղեկատվություն տրամադրել այն անձանց, ովքեր ցանկանում են իրականություն դարձնել այս մտահղացումը:

Հուսով ենք հետաքրքիր էր և մաղթում ենք հաջողություն

Հարգանքով՝ ԱՆԻ ՍԱՀԱԿՅԱՆ

Եղեք իրազեկ, ստացեք Նորություններ Հայաստանից և սփյուռքից